D’r mós ’n nuuj bed kómme; nao de neudige jaore ós gewuiles te höbbe doorsjtange, wore de metrasse aardig verroepzak en de res ouch. Biej ’t kopsjtök wore al ‘ns get sjroeve aangedreijd, mer die rammelde v’r d’r net zo hel weer oet. Ós sjpeelweij haaj zienne beste tied gehad. De aansjaf van zón nuuj sjpringkösse is ‘ne historische sjtap, dae veur netuurlik same ginge zètte.
In de kiekruumte van ’t sjlaopsentrum vele ós bekans de uig oet de bölles; waat ’n bèdde, waat ’n meugelikhede, vergeleke biej ettelikke jaor geleje! Oet zón showroom ’t juuste keze, det woor gènne kattendrek.
Nao ’n uurke proofligke hiej en dao – hel en zaach, hoog en leeg, ónger begeleiding van ’n sjlaop-deskundige – wiste veur ’t nág neet. Gelökkig troch ’t metrassemedamke zich truuk, nao inkele wichtige tips, en kóste v’r vriejoet ós sjlaophajinge en perseunlikke veurkeure oetperbere en fluusterend evaluwere. Op aafsjtandj bekeek de verkuipster noe en den mit bedraag ós gedrej en gewazel.
Mit zoväöl versjillende bedde toet ós besjikking waerde v’r richtig joeksig, al móste veur ós netuurlik inhaje. Toes floetsj dich in zón ligkende positie mekkelik ‘ne werme sjeet, det saort privacy guf ’t neet op perbeer-bedde. Gerdienkes of ’n good gesjlaote kamersjirm liek mich waal get óm te euverwaege, zodet me get kèn eksperimentere op die nuuj metras. Noe alles in ’t aopenbaar getest mót waere, blief ’t ein verrassing wie det oetgekaoze bed zich in de echtelikke realiteit hèlt. sjpanning haet aevel ouch zien sjarme.
Oeteindelik waerde nao lang horizontaal vergadere ein liezjemo gekaoze. Gein geweun liezjemo, mer ein mit allerhandj sjiek-de-friemmel d’raan. Lempkes aan ’t kopsjtök, die se alle kenj op kós drejje en womit se alles in de sjienwerpers kós zètte. ’t Sjónste van al woor aevel de lektriese aafjtandsbedening. Mit ‘ne drök op ’t juuste knuupke geit ’n metrashelf ómhoog, ómleeg, gebaoge en rech, gans sónger meujte, zelfs es se d’rop liks. D’r piep en kraak nieks, boete ós zelf. Van alle kenj veulde v’r ós gepamperd, wie ‘ne bebie in ‘ne maxi cosy. V’r wólle d’r bekans neet meer oet, oet det fantastische bed. Toet emes mich wakker rammelde.
“Sjtank op, die anger luuj wille ouch proofligke!”
Naodet de beneudigde pepiere wore ingevöld en óngerteikend, ginge veur nao hoes, bliej det de kogel door de kerk woor. Wiej de verkuipster nao ’n paar waeke belde det t bed achter ’n paar daag geleverd zooj waere, woor ’t mit de rös gedaon. ’t Voele zjweit mós d’roet eer-det ’t nuuj bed oppe plaats kós waere gezat. De veurbereidende aktiviteite beperkde zich neet toet ós sjlaopkamer mer versjpreijde zich wie ’n aolievlek. V’r ginge óm te beginne oppe zölder sjlaope. Wie einmaol ’t aad bed woor aafgebraoke, kós net zo good innegang de klejjerkas oetgeruumdj en zuver gemaak, de garderobe ‘ns tegooj oetgezóch, toch ouch mer aeve de wenj geverf en nuuj laminaat d’rin. En den ouch mer geliek d’n euverloup aanpakke, wonao ’t trappehoes gans sjaemel oetzoog, en de hal ouch.
Hoes ram ane kantj; kepotmeug zin v’r d’rvan.
Nag aeve en ’t nuuj bed kèn opgezat. Ich kén d’r klam nag van sjlaope.