Vertel ‘ns get

Ein nuuj bed

D’r mós ein nuuj bed kómme. Nao de neudige jaore ós gewich en gewuiles te höbbe verdrage, wore de metrasse aardig verroepzak, krek wie d’n ombouw. Mienne sjat haaj aan ’t kop-ìnj al ‘ns get sjroeve aangedreijd en nuuje biejgezat, mer die zoge baeter oet es de res. Dudelik det ’t sjpringkösse zienne beste tied haaj gehad.

Ein nuuj bed! Allein al de gedachte brach kriebbels euveral. Det nuuj bed zooj namelik ouch metein ’t eerste waere, det door naemes angers es ós twee waerde ingewiejd. Geur begriept det de aansjaf van det bed veur os relasie ‘ne gedinkwaerdige sjtap beteikende, eine dae veur netuurlik same ginge zette.

In de grote kiekruumte van ’t sjlaopsentrum vele ós bekans de uig oet de kop. Zoveul bedde, zoveul meugelikhede! Det zol nag neet mekkelik waere, om oet det alles ’t beste bed te keze.

Nao ’n uurke proofligke hiej en dao – van hel nao zaach, van hoog nao leeg, biejgesjtaon door de bedde-raodgaefster – mós d’r ’n besjloet waere genaome. Gelökkig haaj die metrassemedam zich biej os gesjravel van ’t eine bed op ’t anger boete inkele goodbedoelde aanwiezinge neet te dök mit ós bemeujd. Veur kóste dus vriejoet alle sjlaopsituasies en perseunlikke gebroeke op ós gemaak toepasse en ongerein bespraeke, terwiel zeej ’t gedrei, gewiermel en euverlek vanoet de verte volgde.

Veur nome ós de tied d’r veur, want noe v’r einmaol zoveul versjillende bedde toet ós besjikking haje, woorte v’r richtig joeksig. Neet det veur geliek wie dolle tekeer ginge en krek deje es toes, nae. Jaomer genog ging det neet. Ich wil dao waal veur pleite, veur van die sjirmkes róndjóm die perbeerbedde. Wie in ein ziekehoes, veur de hoogneudige privacy. Nae, leefs ’n saort isoleercel, zodet m’n ech àlles ken perbere. Det nuuj bed mót dao taege kenne. Ich zoog det al richtig veur mich: det vruike zolle v’r mit lunchpauze sjture, de tent laote sjloete veur ein half uurke of zo. Det mós toch te doon zin.

Noe det neet ken, blief ’t ein verrassing, wie ein oetgekaoze bed zich in ’t ech gedreug.
Mer ouch det óngewisse haet netuurlik zien charme.

Oeteindelik waerde nao lang ligke en dreije ein liezjemo gekaoze. Gein geweun liezjemo, maar ein met nogal get ekstraatjes. D’r zote sjoon lempkes baovenaan ’t kop-inj geknepe, en ein spesjaal euvertrek kaom op de metrasse, waodoor dae eewige reet tösse um en mich verleje tied woor. Mer ’t sjoonste van alles woor toch de lektriese bedening. Omhoog, omleeg, gebaoge en rech ginge de metrasse,  zonger meujte, zelfs mit alle kilo’s van ós twee same d’r op. D’r piepde en kraakde nieks, boete ós zelf den. Van alle kenj waerse taegeswaordig gepamperd door de metrassemakers.

Wie ich eindelik oetgefiespernöld haaj wie die knuupkes van det bedeningsdink werkde, veulde ich mich richtig wie ‘ne bebie in ‘ne maxi cosy. Ich wooj d’r eigelik al neet meer oet, oet det zich gans nao mien winse veugende bed. Mienne sjat mós mich oeteindelik wakker make wie d’r luuj naeve mich op ein proofrit sjtónge te wachte.
’t Leek waal ’n kirmesattractie. Ós beurt woor veurbiej.

Naodet v’r de besjtelling haje gedaon, ginge veur nao hoes. Dao druimde veur verder euver os nuuj sjpeelveldj. Ich weit neet of geer al ‘ns ein aad bed veur ein nuuj höb geruuld, mer det haet get veut in de eerd,ken ich uch zègke, eer-det zón sjevaak opgeboewd ken waere! Wiej de sjlaopmevrouw belde det ’t bed d’r achter ’n paar daag aan koom, kóste veur aan de sjlaag. En wie! Nou, m’n haet get luij zjweit gereid eer-det alles vaerdig is om te röste! De aktiviteite beperkde zich al lang neet meer toet de echtelikke sjlaopkamer. Nae, ’t woord al erger en erger.

Noe v’r toch einmaol aan de geng wore, kós net zo good metein de kas oetgruumdj en zuver gemaak, det ging in ein meujte door. Krek wie biej de verhoezing kome veur d’r achter det v’r veul te veul greij haje. Wo koom det toch vanaaf en wo noe toch dao-mit haer? Mer good, ’t hoes is aan de kantj.
Kapotmeug bön ich d’r intösse van.

Nag aeve en ’t nuuj bed waerd aafgeleverd. Ich kan d’r noe al neet van sjlaope…

Óngewunsjde intimiteite

Gaot geur waal ens mit eure miens nao ein lingeriezaak? Of blief dae boete sjtaon wachte? Nae toch? Dae gooje miens wèt neet waat d’r mis!

Miene miens is miene boezemvrundj, dae geit leefs altied mit. En mit nao binne dus. Ein oetzunjerlik geval.

Lets brachte v’r weer ens same ein bezeuk aan dae biezónjer favoriete winkel van ‘m. Neet det hae dao oojt get geit koupe, mer toch. Hae hèlt mich gaer gezelsjap es ich dao haer gaon. Dae winkel dae ich noe mein, is neet veur de neudige óngersjteuning, nae, dees spesjaalzaak bezeuk ich veur gans anger doeleindje. Dit is veur mich, en ouch veur um dus, eine richtige feeswinkel, vol mit pretpakkette. En ich bön d’r altied good geholpe, dus dèt is mien adres veur ein nuuj pretpakketje.

Mer good. ’t Woor dus weer tied voor ein paar frisse variaties op ‘n aad thema. Ich zoog die uigskes van miene sjat al glinstere wie ich vroog of hae de maote nag wis. ‘Nae’, zag d’r, ‘mer ich wil die medein waal aeve opnumme.’  Zo hulpvaerdig es dae altied is, ongeluiflik. Dae wooj netuurlik al ein veursjot op ‘t fees. Nou, dao haaj ich nieks op taege. Mer hae noom zich de tied d’r veur.

Mer taege dèt veur biej de böshalte aankaome, sjoot ‘m ‘t breefke mit die maote te binnen. Glad vergaete oppe keuketaofel. Wie d’r zo wied woor, kós d’r neet meer trök, want de bös kós idder moment kómme.” Ich weit ’t zó ouch waal”, zag d’r, zjweide get mit zien henj get in de lôch en knipde mich ‘n uigske. Dae sjalevaeger.

Lang kós ich neet kwaod blieve. Terwiel v’r dao zo op det böske sjtónge te wachte, sjtelde ich mich zo veur, wie sjoon ich d’r sjtraks weer op zooj sjtaon. Jao, ich bön bes waal ein prónk-eppelke,al zègk ich ‘t zelf. Neet det ich altied zo greuts bön gewaes op wat Moder Natuur mich haet toebedeildj, mer mit de joare leert me ’t eige lief waerdere. Ich sjpitsde mich den ouch bienao net zo es miene miens op ‘t oetzeuke van ein nuje, sjpannende  verpakking. Get in ein sjoon kleur en met ‘n kentje mos ‘t waere. Det duit toch net get meer veur ein vrouw, es zo ’ne vleiskleurige seksappeal-killer. Noe zègk toch eerlik: es se ónger dien sjtoere jeans en trui zo’n super romantisch setje dreugs, den verhüegt det zeut geheim neet allein dien bille en boezem, mer ouch zeker dien sjtumming. Tenminste, zo wirkt det biej mich.

En ouch op ós relatie haet det ’t juuste effect. Mit de aansjaf van get nuujs kump d’r weer get schwung in de zaak. Zeker es ich daobiej get euver de päöl kal, den is ’t es of v’r vraemdjgaon mit ‘ne bekende. Noe begriept geer det miene sjat zich altied gans vriejwillig opgeuf es  kompenie op zo’n  wichtige expreditie. Same op paad nao de linzjeriezaak is dus op veurhandj lol veur twee. Geer höbt al door det miene miens gein tiep is dèt zich boete biej de deur leut taegehaje. Dae zal waal gek zin, om veur de sjnoepwinkel te blieve wachte! Vandao det de verkuipsters van mien favoriete kleidingzake ‘m intösse allemaol kinne. De meiste vinge ‘t waal geinig, ‘ne manskael dae zich interesseert veur vrouwluujzake en dao ouch nag op tied ’n meining euver haet. Die d’r neet veur zich hèlt. Dus.

Mer good. Zo es gezag, lete v’r os mit ‘t böske oppe sjtad aan rieje. Biej ’t oetklokke besjlaote v’r, mer geliek oppe lingeriezaak aan te loupe. Dit woor de belangriekste raeje van ós reis ,dus  gein tied te verleze! Opgetaoge sjtapde v’r rech op ós doel aaf. Nag aeve in de etalaasj kieke, daonao keke v’r  elkaar breid lachend aan: ‘t fees kós beginne!

In de winkel waore gein anger klantje, allein ein verkuipster, doonde met oprume. Det koom good oet. Veur zoge al heel get sjoons hange en ligke. Ós verwachtinge waore hoog gesjpanne. Tösse de rieje mit kleurige en glanzende lingerie-ongerdeile, ós ouge lings en rechs good de kós gaevend, lepe veur nao de toonbank. Dao ging ‘t metein al mis. Neet biej ós, veur zoge allein mer sjoon dinger om ós haer. Mer wie v’r die verkuipster haje gezach waat v’r kaome doon, keek ze van mich nao miene miens en trök, en toen sjaote heur winkbroewe toet ongekindje heugte in heure kop. Det verwonjerde ós. Kiek, de moogs toch verwachte dèt zo’n verkuipster heel get gewindj is en neet gouw örges van sjteit te kieke. Zeker neet es ein vrouw heure miens es kompanjie mitbringt. Ze keek neet bliej, zaach oetgedrök. Mer good, v’r wore zowied gekómme en zoje paol haje, toet ós missie gesjlaag woor.

De verkuipster knipperde ‘s mit de uig en zach, det ze nag ‘n bietje mós oprume en ós daonao zol kómme helpe. En inderdaad, ze verdween mit ein paar ontieglik kleine lepkes achter ‘n rek.

Veur waerde intösse al tamelik óngedöldig en begaove ós al vès mit hongerige uig tösse de sjone verrassinge, waoveur v’r oeteindelik toet dao wore gekómme. Opgetoage bekeek miene sjat de ganse santekraom van veur toet achter en goof oetgebreid en óngerboewd kommentaar. Ich keek get serieuzer rondj, mer neet minder enthousiast. Nao inkele minute veugde ‘t  verkoupvruike zich mit fien trippelpeskes biej ós. Zjwiegend hael ze mich ’t eine nao ’t angere lingeriesetje veur, waovan oeteindelik ein redelik aantal in mien moat opziej waerde gelag. ’t Aanpasse kós beginne! Ich haaj ‘n heel riej te gaon, dus ich sjpoojde mich nao ‘t pashökske. Rap die kleijer oet.

En die dinger zaote sjtrang aan die hengerkes, ich mós d’r al flink aan riete! Sjoeverechtig begós ich onger- en baovesjtökke te passe. ’t Allereerste setje gaajde mich gaar oets neet. Hiej te krap en dao te klein. Wiejer mer weer. Mit det ich mich in ein volgend setje wiermelde, kreeg ich ’t waal al get wermer, det sjaelde. Biej ‘t derde setje waor ’t pries: sjoon en sjpannend en precies good, det zoog ich zelf ouch waal in de sjpegel. Ich loerde door de sjpleet van ‘t paskamergerdienke en fluusterde “kom kieke” taege de rök van miene sjat. Wie d’r zich omdrejde, zoog ich det hae in opperste concentratie in ‘ne sjponsbeha haaj sjtaon kniepe. Jao, zoget  haaj dae nag noojt in ’t ech gezeen. Sjpons is get veur de rame te wasse, vinj ich, neet veur aan mien lief.

Ich haaj van ech, en hae ouch. In lóch kniepe moog d’r, es d’r ‘t werm vleis mer neet links leut hange. En det deej d’r neet, want wie d’r in de gate haaj, det d’r werk aanne winkel woor achter ’t gerdienke, haaj d’r op sjlaag genóg van de loch. Woor ‘m ouch geraoje. Zo sjnel höb ich ‘m nag noojt zeen sjprinte. Mit ein nuuj record op ziene naam en ein gelökzalige oetdrökking op zien gezich veel d’r ’t pashökske binne, mit de naas in de bótter, zal mer zègke. En begós metein mit jurére. Ich heurde al get goodkeurend gefluuster.

Klaorbliekelik sjoot ós perfecte samewirking de verkuipster in ‘t verkeerde kaelsgaat. Want sjnel es ein mitrailleurvuur heurde veur heur peskes dunderbiej kómme. Waodoor v’r metein zoget versjtiefde achter det  gerdienke. Gelökkig deej zeej geine inval, mer klónk d’r ein besjeije kuchske  womit ze heur plaats es adviseur koom opeise. Toen miene miens ‘t gerdienke aan de kantj sjoof, keek ze ós aan es of veur heur pashökske haje ontwiejd. Waat hèt pashökske, de heel zaak! Wie ’n sjtreng begien trooj ze binnen. Ze duujde  miene miens nach net neet aan de kantj, mer ’t sjaelde neet veul; heur heel opsjtelling sjprook bookdeile. Miene sjat deej d’r nag ein sjöpke bovenop door aan te wieze welke van de lingerie-setjes hae de sjoonste vónj – waobiej hae es klap op de vuurpiël ‘t bendje van de beha dae ich aanhaaj,nag aeve leet knalle – en sjtapde toen röstig trök, de winkel in. Ich mós miene lach verbiete, terwiel de verkuipster mien veurkomme mit versjtandj van zake nag ens aeve good sjikde. Heur kaaj henj lete mich dinke aan die van ‘ne sjlechter, dae ‘t vleis op ein sjaolke lègkt. Mesjien duit dae sjlechter det nag waal mit meer leefde veur ’t vak es dees madam.

Wie ich taege heur zach, det ich alle drie de setjes waal wol höbbe, woord ze al get toegènkelikker. En biej ‘t aafraekene keek ze ós sjtraolend wie ein bleumke aan, es of veur opèns heuren daag in eine gelöksdaag haje verangerd. Of zooj ze höbbe opgekeke van ‘t feit det ich mien eige lingerie aafraekende? Haaj ze soms get angers  verwach? En móste veur det noe es ein compliment opvatte? Wie den ouch, ós missie woor gesjlaag.

Biej ‘n glaeske van ‘t ein en anger höbbe veur in ‘n broen kefeeke nag ‘n tiedje euver ’t gebeurde naogekaldj. Veur veulde ós es of v’r haje biejgedrage aan ‘n klein revolutie. In idder geval aan ein klein revolutie in de meneer van dinke van die verkuipster van dao net. De volgende keer zooj die zich zeker get ruumdinkender opsjtelle, meinde veur. Dankzij ós.

Dink dao mer ins aan, es geer weer ins get nuje lingerie gaot oetzeuke. En neem eure sjat veural mit en maak d’r ‘n fees van, same!

Laatste nieuws

Contact

mobiel: 06 123 18 995 lisa.naus.2010@gmail.com